Search Items

Ɗan Marigayi Déby ya gaji kujerarsa ta shugaban ƙasar Çhadi Muhammad ɗan kasa da shekaru 40


An haifi Janar Mahamat Idriss Déby a 1983 inda ya zama ɗaya daga cikin 'ya'yan marigayi Idriss Deby. Ana masa laƙabi da Mahamat Kaka, saboda a hannun kakarsa ya taso. Kaka na nufin kaka a larabcin Chadi.

A lokacin da mahaifinsa ya mutu, shi ne shugaban dakarun da ke tsaron shugaban kasa, kamar yadda wakilin BBC a Chadi ya bayyana. Wanda ya kara da cewa ya taka rawa a fafatawa da dama da sojoji suka ringa yi a tsawon rayuwarsa ta aiki.

A 2009, Mahamat Idriss Deby ya halarci yakin da Am Dam, wanda aka fafata da wani dan uwansa Timan Erdimi, da ke zama ɗan ɗan uwan tsohon shugaban ƙasar, a gabashin Chadi.

To amma duk da haka, dole ne a bayyana cewa ba fitacce ba ne a lokacin da mahaifinsa yake shugaban ƙasa. Sai dai ya ringa kula da aiyukan samar da tsaro ga shugaban ƙasa, kuma yana da matukar faɗa a ji wajen kula da kayan yaƙi na sojojin ƙasar.

A cewa mai magana da yawun rundunar sojan ƙasar, Colonel Azem Bermandoa Agouna, babban aikin majalisar rikon kwaryar da Mahamat yake jagoranta shi ne kare martabar ƙasar da tabbatar da tsaro a cikin gida "a wannan lokaci da ake yaki da ƙungiyoyin 'yan ta'adda kuma dakarun shedan".

Har zuwa yanzu dai ba a sani ba ko sabon shugaban gwamnatin ta soja na da wani buri na siyasa a ƙasar.

Source BBC Hausa